திருச்சிற்றம்பலம்

மூங்கில் போன்ற தோள்களையுடைய உமாதேவியை இடது பாகத்திலே வைத்தவனும், விஷத்தை உண்டு (அதனால்) இருண்ட
நீலகண்டனும் ஆகிய சிவபிரான் மிகச் சிறந்த வீணையைத் தடவி, குற்றமில்லாத இளஞ்சந்திரனையும் கங்கையையும்
முடியின்மீது தரித்து, அடியேனது உள்ளத்தில் எழுந்தருளிய காரணத்தால், சூரியனும், சந்திரனும்,
அங்காரகனும், புதனும், குருவும், சுக்கிரனும், சனியும், இராகுவும் கேதுவுமாகிய இரு பாம்புகளும்
தொண்டர்கட்கு மிகுதியாகவே குற்றமற்றவனாய் நல்லனவாகும்; அவை நல்லனவே செய்யும்

எலும்பும் பன்றிக்கோடும் ஆமை ஓடும் ஆகிய இவை திருமார்பில் விளங்கவும், ஊமத்த மலர் மாலையையும்
கங்கையையும் முடியிற் சூடியும், உமாதேவியோடும் விடையூர்ந்து எழுந்தருளி வந்து அடியேனது உள்ளத்தில்
புகுந்த காரணத்தால் ஒன்பதாவது நாளாகிய ஆயில்யமும், பத்தாம் நாளான மகமும், பதினோராம் நாளாகிய விசாகமும்,
பதினெட்டாம் நாளாகிய கேட்டையும், ஆறாம் நாளாகிய திருவாதிரையும் ஆகிய இவையோடு வைத்து எண்ணப்படும் பரணி,
கார்த்திகை, பூரம், சித்திரை, சுவாதி, பூராடம், பூரட்டாதி எனப்படும் இந்நாட்களனைத்தும் அடியார்களுக்கு
மிகவும் அன்புடன் நல்லன; அவை நல்லனவே செய்யும்.

அழகு மிகுகின்ற பவளம் போன்ற சிவந்த திருமேனியில் திருவெண்ணீற்றை அணிந்து, மணங்கமழ்ந்து அலர்கின்ற கொன்றை
மாலையையும் பிறையினையும் முடியிற் சூடி, வெள்விடை மேல் உமையம்மையாருடன் அடியேனது உள்ளத்தில் எழுந்தருளிய
காரணத்தால் பொன்மகளும், நாமகளும், கொற்றவையும், பூமகளும், திசைகாப்பாளருமாகிய பல தெய்வங்களும்
திருத்தொண்டர்களுக்கு மிகவும் அரிய முறை உடையன என்றாலும் நல்லன; அவை நல்லனவே செய்யும்.

பிறை போலும் நெற்றியையுடைய உமையம்மையோடு வடதிசையில் இருந்து வேதங்களைத் திருவாய் மலர்ந்தருளுகின்ற
எங்கள் சிவபெருமான், கங்கா நதியோடு கொன்றை மாலையைத் திருமுடியிற் சூடி, அடியேன் உள்ளத்தில் புகுந்த
காரணத்தால், கோபிக்கும் காலனும், தீயும், நமனும், இயமதூதர்களும், கொடிய நோய்களும் ஆகிய இவை எல்லாம்
தொண்டர்களுக்கு மிகவும் நன்மை செய்யக்கூடியனவாம்.

விஷத்தை அணிந்த திருநீல கண்டத்தை உடையவரும், எமது தந்தையும், உமாதேவியோடு ஆனேற்றை ஊர்ந்தருளுகின்ற
அடியார்களது பரமனுமாகிய சிவபிரான், மிக்க கருநிறம் உடைய வன்னியையும் கொன்றை மலரையும் முடியில் தரித்து
அடியேனது உள்ளத்தில் எழுந்தருளிய காரணத்தால், கொடிய சினமுடைய அசுரரோடும், அச்சத்தை உண்டாக்கும் இடியும்,
மின்னலும், மிகுதியான பூதங்களும் தொண்டர்களுக்கு மிகவும் பயப்படுந்தன்மை உடையவனவாய் நல்லனவாகும்; அவை
நல்லனவே செய்யும்.

ஒளியையும் கோடுகளையும் உடைய புலித்தோலாடையாகிய கட்டின கோவணத்தையுடைய இறைவர், அன்றலர்ந்த மலர்களையும்
வன்னியையும், கொன்றை மாலையையும், கங்கையையும் திருமுடியில் சூடி, உமாதேவியாருடன் எழுந்தருளி வந்து,
அடியேனுள்ளத்தில் புகுந்த காரணத்தினால், கொலைத் தொழிலையுடைய சிங்கம், புலி, யானை, பன்றி, பாம்பு, கரடி,
மனிதக் குரங்கு ஆகிய இவை யாவும் தொண்டர்களுக்கு மிகுதியும் நல்லன; அவை நல்லனவே செய்யும்.

புகழ்ந்து பேசக்கூடிய இளமையான தனங்களையுடைய உமாதேவியார் ஒரு பக்கத்தில் அமர, இடபத்தை
ஊர்ந்தருளுகின்ற செல்வராகிய இறைவர், தம்மை வந்து அடைந்தவர்களான திங்களையும், கங்கையையும் முடியில்
தரித்து, அடியேனுடைய உள்ளத்தில் எழுந்தருளிய காரணத்தால், வெப்பம், குளிர்ச்சி, வாதம், பித்தம்,
மற்றுமுள்ள தீவினைகளும் தொண்டர்களுக்கு அதிகமாக வந்து வருத்தாத அவ்விதத்தில் நல்லனவாம்; அவை நல்லனவே
செய்யும்.

மன்மதன் பட்டொழியும்படி அந்நாளில் விழித்து நோக்கி, உமாதேவியாரோடும் கூடினவராய்,
சந்திரனையும் வன்னியையும் கொன்றை மலரையும் சிரசில் தரித்து, எருதின்மேல் எழுந்தருளி வந்து அடியேனது
உள்ளத்தில் புகுந்த காரணத்தால், ஏழு கடல்களும் சூழ்ந்த இலங்கைக்கு அரசனாகிய இராவணனோடு ஆழ்ந்த கடல்களும்,
பிற துன்பங்களும் நெருங்கி வருத்தாது தொண்டர்களுக்கு மிகவும் நல்லன; அவை நல்லனவே செய்யும்.

பலபலவான திருவுருவங்களோடு கூடிய பரமரும், பெண்ணொரு பாகரும், விடையை ஊர்கின்ற அடியோர்களது மேலோனுமாகிய
இறைவர், கங்கையோடு எருக்க மலரையும் திருமுடியில் தரித்து அடியேனது உள்ளத்தில் எழுந்தருளிய காரணத்தால்
நான்முகனும், திருமாலும், வேதங்களும், தேவர்களும், சுழன்று வரும் காலமும், கடலும், மலையும் ஆகிய இவை
எல்லாமும் தொண்டர்களுக்கு அதிகமாக நல்லனவாம்; அவை நல்லனவே செய்யும்.

பூங்கொத்துக்கள் பரந்த கூந்தலையுடைய உமாதேவியாரோடு அருச்சுனனுக்கு அருள்செய்த வேடராகிய இறைவர், ஊமத்த
மலரையும் சந்திரனையும் பாம்பையும் திருமுடியில் தரித்து அடியேன் உள்ளத்தில் எழுந்தருளிய காரணத்தால்
இறைவனது திருவெண்ணீறு, புத்தர்களையும் சமணர்களையும் வாதத்தில் தோற்கடித்துக் கெடும்படி செய்யும்; இது,
உண்மையும் உறுதியும் ஆம். அந்தத் தகுதியினால் தொண்டர்கட்கு மிகுதியாகவே அவர்களால் வரும் தீயன யாவும்
நல்லன; அவை நல்லனவே செய்யும்.

தேன் பொருந்திய மலர்கள் நிறைந்த சோலைகளும், கரும்பின் ஆலைகளும், செந்நெற்பயிர்களும் நிறைந்து, இந்த
வளப்பங்களால் மிகுந்த பொன்வளம் எங்கும் சிறக்கும், நான்முகன் முதற்கண் பூசித்து வழிபட்ட பிரமாபுரம்
என்னும் சீகாழிப் பதியில் அவதரித்து வைதிக ஞானத்தையுடைய திருஞானசம்பந்தன், கோள்களும் நாள்களும்
தொண்டர்களை வருத்தாதவாறு உரைத்த சொல் மாலையாகிய திருப்பதிகத்தை ஓதுகின்ற அடியார்கள் மேலுலகத்தில் அரசராக
ஆளக்கடவர். இது நமது ஆணையாகும்.

மகான் ஒளவையார் அருளிய விநாயகர் அகவல் வீடுபேறு அடைவது பற்றியே பேசுவதாகும். இதை ஞானிகள் ஆசி இல்லாமல்
அறிந்துகொள்ள முடியாது. ஞானிகள் திருவடியை பூஜிக்க பூஜிக்கதான் இதில் உள்ள நுட்பங்களை தெரிந்துகொள்ள
முடியும்.

உயிர்க்கொலை தவிர்த்தும் புலால் மறுத்தும் முடிந்த அளவிற்கு ஏழைகளுக்குப் பசியாற்றியும் ஞானிகள்
திருவடியை பூஜித்தும் ஆசிபெறுகின்ற மக்களுக்கு இதில் உள்ள நுட்பங்களை தெரிந்துகொள்ள முடியும். எனவே
ஞானக்கடலாகிய ஒளவையார் திருவடியைப் போற்றி ஜென்மத்தைக் கடைத்தேற்றிக் கொள்ள வேண்டும்.