மரணமிலாப் பெருவாழ்வையும், ஞானத்தையும் முதன் முதலாக கண்டுபிடித்தவனும், அறிந்தவனும், அறிந்து கடைத்தேறி வெற்றி பெற்ற முதல் மனிதனும் முருகனே என்றும், மனிதன் கடவுளும் ஆகலாம் என்ற பேருண்மையையும் அவன்தான் முதன்முதலில் கண்டவனும், அடைந்தவனும் ஆவான் என்பதையும் அறியலாம்.

இருவினையற்ற பெருந்தெய்வம் முருகன் திருவடியே, இருவினையறுக்க துணையாய் வரும் என்பதை அறியலாம். வினை வென்ற திருமுருகன் திருவடித் துணையின்றி, வேறொன்றாலும் வினை வெல்ல முடியாது என்பதையும் அறியலாம்.

பாவ சுமைகளிற்கு காரணம் நாம் பல ஜென்மங்களில் உயிர்க்கொலை செய்து புலால் உண்டதாலும், யான் என்ற கர்வத்தாலும், கொடும் கோபத்தாலும், பொல்லாத காமத்தாலும், பேராசையினால் பிறர் பொருளை அபகரித்ததாலும், பிறர் வளர்ச்சி கண்டு பொறாமைப்படுகின்ற காரணத்தாலும் வருகின்றது என்பதை அறியலாம்.