admin

விண்ணினுள் விண்ணாய் விண்ணடு விண்ணாய் அண்ணி நிறைந்த வருட்பெருஞ் ஜோதி – 338   விண்ணினுள் விண்ணாய் விண் நடு விண்ணாய் அண்ணி நிறைந்த அருட்பெருஞ்ஜோதி !   அண்டவெளியின் உள்ளே மற்றொரு வெளியாக (ஆகாயமாக), அந்த வெளியின் மையத்திலும் (நடுவிலும்) ஜோதிச் சொரூபமாக, எங்கும் இடைவெளியின்றி நெருங்கிப் பூரணமாக நிறைந்திருக்கும் அருட்பெருஞ்ஜோதியே!

உலகெலாம் பரவவென் னுள்ளத் திருந்தே அலகிலா வொளிசெய் யருட்பெருஞ் ஜோதி – 336   உலகெல்லாம் பரவ என்னுள்ளத்து இருந்தே அலகு இலா ஒளி செய் அருட்பெருஞ்ஜோதி !   உலக மக்கள் அனைவரும் என்னை வாழ்த்திப் புகழும்படி, என்னுடைய உள்ளத்திலேயே நிரந்தரமாக வீற்றிருந்து, அளவிட முடியாத ஞான சக்தியையும், ஒளியையும் என்னுள் வெளிப்படுத்திய அருட்பெருஞ்ஜோதியே!

அருட்பேர் தரித்துல கனைத்து மலர்ந்திட அருட்சீ ரளித்த வருட்பெருஞ் ஜோதி – 334   அருட்பேர் தரித்து உலகனைத்தும் மலர்ந்திட அருட் சீர் அளித்த அருட்பெருஞ்ஜோதி !   அருள் என்னும் பெருமைக்குரிய பெயரைச் சூட்டி, உலகத்தில் உள்ள அனைத்து உயிர்களும் மகிழ்ந்து மலர்ச்சி அடையுமாறு, அருளால் உண்டான அரிய சிறப்புகளையும் எனக்கு அளித்த அருட்பெருஞ்ஜோதியே!

விருப்போ டிகலுறு வெறுப்புந் தவிர்த்தே அருட்பே றளித்த வருட்பெருஞ் ஜோதி – 332   விருப்போடு இகலுறு வெறுப்பும் தவிர்த்தே அருட்பேறு அளித்த அருட்பெருஞ்ஜோதி   உலகியல் பற்று (விருப்பு) மற்றும் அதனுடன் முரண்படும் வெறுப்பு ஆகிய இருவிதமான மன சலனங்களையும் நீக்கி, அருளை மட்டுமே நிரந்தரமான பெரும் பயனாக எனக்கு அளித்த அருட்பெருஞ்ஜோதியே!

சுருள்விரி வுடைமனச் சுழலெலா மறுத்தே அருளொளி நிரப்பிய வருட்பெருஞ் ஜோதி – 330   சுருள் விரிவுடை மனச் சுழல் எலாம் அறுத்தே அருள் ஒளி நிரப்பிய அருட்பெருஞ்ஜோதி !   சுருங்குதல், விரிதல் என நிலையற்று அலைந்து திரியக்கூடிய மனதின் சலனங்கள் அனைத்தையும் நீக்கி, என்னுடைய உள்ளத்தில் அருள் என்னும் ஞான ஒளியை முழுவதுமாக நிரப்பியருளிய அருட்பெருஞ்ஜோதியே!

வெருள்மன மாயை வினையிரு ணீக்கியுள் அருள்விளக் கேற்றிய வருட்பெருஞ் ஜோதி – 328   வெருள் மனமாயை வினை இருள் நீக்கி உள் அருள் விளக்கு ஏற்றிய அருட்பெருஞ்ஜோதி !   அச்சம் கொள்ளும் மனதை சூழ்ந்திருந்த மாயை மற்றும் வினைப்பயனால் வந்த அறியாமை இருளை நீக்கி, என்னுடைய உள்ளத்தின் உள்ளே அருளையே வடிவமாகக் கொண்ட ஞான விளக்கை ஏற்றியருளிய அருட்பெருஞ்ஜோதியே!

உருள்சக டாகிய வுளஞ்சலி யாவகை அருள்வழி நிறுத்திய வருட்பெருஞ் ஜோதி – 326   உருள் சகடாகிய உளம் சலியா வகை அருள்வழி நிறுத்திய அருட்பெருஞ்ஜோதி !   உருண்டு ஓடும் சக்கரத்தைப் போல நிலையற்று அலைந்து திரியக்கூடிய என்னுடைய மனம், இனிமேல் சோர்வடையாமல், அருள் நெறியாகிய ஒரே பாதையில் உறுதியாக நிலைபெறச் செய்த அருட்பெருஞ்ஜோதியே!

பொருட்பத மெல்லாம் புரிந்துமே லோங்கிய அருட்பத மளித்த வருட்பெருஞ் ஜோதி – 324   பொருட் பதமெல்லாம் புரிந்து மேலோங்கிய அருட்பதம் அளித்த அருட்பெருஞ்ஜோதி !   உலகியல் தத்துவங்கள், பொருட்கள் அனைத்தின் உண்மையையும் நான் அறிந்து கொள்ளச் செய்து, அந்த உலகியல் அறிவுக்கு அப்பாற்பட்ட, மேலான மோட்ச நிலையை எனக்கு அளித்த அருட்பெருஞ்ஜோதியே!

தெருணிலை யிதுவெனத் தெருட்டியென் னுளத்திருந்து அருணிலை காட்டிய வருட்பெருஞ் ஜோதி – 322   தெருள் நிலை இது எனத் தெருட்டி என் உளத்தில் இருந்து அருள் நிலை காட்டிய அருட்பெருஞ்ஜோதி !   உண்மையான, தெளிவான ஞானநிலை இதுவே என்று எனக்குத் தெளிவாக உணர்த்தி, என்னுடைய உள்ளத்திலேயே நிரந்தரமாக நிலைபெற்றிருக்கும் அருள் என்னும் நித்திய நிலையை (ஜோதி சொரூபத்தை) எனக்குக் காட்சி அளித்த அருட்பெருஞ்ஜோதியே!