admin

மண்ணுருச் சத்திகள் மண்கலைச் சத்திகள் அண்ணுற வகுத்த வருட்பெருஞ் ஜோதி – 386   மண் உருச் சத்திகள் மண் கலைச் சத்திகள் அண்ணுற வகுத்த அருட்பெருஞ்ஜோதி !   நிலமாகிய பூதத்தில் பலவிதமான வடிவ ஆற்றல்களையும், அந்த நிலத்தின் அடிப்படைத் தத்துவ ஆற்றல்களையும் (கலைச் சக்திகளையும்) ஒன்றோடொன்று பிணைத்து, உலகை இயக்கச் செய்தருளிய பேரருள் வடிவமே அருட்பெருஞ்ஜோதி.

மண்ணியற் சத்திகள் மண்செயற் சத்திகள் அண்ணுற வகுத்த வருட்பெருஞ் ஜோதி – 384   மண் இயற் சத்திகள் மண் செயல் சத்திகள் அண்ணுற வகுத்த அருட்பெருஞ்ஜோதி !   பூமிக்கு இயல்பாகவே உள்ள நிலைத்தன்மைச் சக்திகளையும், அந்தப் பூமியில் நிகழும் செயல்முறைச் சக்திகளையும் (விளைச்சல், சுழற்சி போன்றவை) ஒன்றோடு ஒன்று நெருக்கமாகவும், பிசகாமலும் பொருந்தும்படி அமைத்து அருளிய அருட்பெருஞ்ஜோதியே!

மண்ணிலைந் தைந்து வகையுங் கலந்துகொண் டண்ணுறப் புரிந்த வருட்பெருஞ் ஜோதி – 382   மண்ணில் ஐந்து ஐந்து வகையும் கலந்து கொண்டு அண்ணுறப் புரிந்த அருட்பெருஞ்ஜோதி !   நிலம் என்னும் பூதத் தத்துவத்தில், மற்ற நான்கு பூதங்களின் கூறுகளையும் ஐந்தாகக் கலந்து, அவை அனைத்தும் ஒன்றோடு ஒன்று நெருக்கமாகப் பொருந்தும்படி செய்தருளிய அருட்பெருஞ்ஜோதியே!

மண்ணிடை யடிநிலை வகுத்ததிற் பன்னிலை யண்ணுற வமைத்த வருட்பெருஞ் ஜோதி – 380   மண்ணிடை அடிநிலை வகுத்து அதில் பல நிலை அண்ணுற அமைத்த அருட்பெருஞ்ஜோதி !   பஞ்சபூதங்களில் மண் தத்துவம் அடியாகவும், ஆகாயம் முடியாகவும் குறிப்பிடப்படுகிறது. அந்த நிலையில் பல நிலைகளையும் வகுத்து பொருந்துமாறு அமைத்த அருட்பெருஞ்ஜோதி!

மண்ணினி லைந்தியல் வகுத்ததிற் பல்பயன் அண்ணுற வகுத்த வருட்பெருஞ் ஜோதி – 378   மண்ணினில் ஐந்தியல் வகுத்து அதில் பல்பயன் அண்ணுற வகுத்த அருட்பெருஞ்ஜோதி !   நிலப் பூதத்தில் ஐம்புலன்களுக்குரிய ஐவகை இயல்புகளைப் பகுத்து, அந்த இயல்புகளிலிருந்து மனித வாழ்வுக்குத் தேவையான பலதரப்பட்ட நன்மைகளும் பயன்களும் கிடைக்கப்பெறும்படி செய்தருளிய பேரருள் வடிவமே அருட்பெருஞ்ஜோதி.

மண்ணினிற் பற்பல வகைகரு நிலையியல் அண்ணுறப் புரிந்த வருட்பெருஞ் ஜோதி  – 376   மண்ணினில் பற்பல வகை கருநிலை இயல் அண்ணுறப் புரிந்த அருட்பெருஞ்ஜோதி !   மண்ணில் பலவகை உயிரினங்களும் அதன் இயல்பு தன்மைக்கு ஏற்றவாறு பொருந்தி வாழ வகை செய்த அருட்பெருஞ்ஜோதி!

மண்ணினி னாற்றம் வகுத்தது பல்வகை அண்ணுறப் புரிந்த வருட்பெருஞ் ஜோதி – 374   மண்ணினில் நாற்றம் வகுத்து அது பல்வகை அண்ணுறப் புரிந்த அருட்பெருஞ்ஜோதி !   நிலப் பூதத்தின் மணம் (நாற்றம்) என்பதை பல வகைகளாகப் பிரித்து, உலகப் பொருள்களில் அவற்றின் இயல்புக்கேற்பப் பொருந்தும்படிச் செய்த பேரருள் வடிவே அருட்பெருஞ்ஜோதி.

மண்ணினி லைம்பூ வகுத்ததி லைந்திறம் அண்ணுற வமைத்த வருட்பெருஞ் ஜோதி – 372   மண்ணினில் ஐம்பூ வகுத்து அதில் ஐந்திறம் அண்ணுற அமைத்த அருட்பெருஞ்ஜோதி !   நிலமாகிய பூதத்தில் மற்ற நான்கு பூதங்களின் (நீர், தீ, காற்று, ஆகாயம்) தன்மைகளையும் கலந்து, அவற்றுக்கான ஐந்திறங்களான குணங்களையும் பொருந்தச் செய்து உலகைப் படைத்த பேரருள் வடிவமே அருட்பெருஞ்ஜோதி.

மண்ணினிற் பொன்மை வகுத்ததி லைமையை யண்ணுற வகுத்த வருட்பெருஞ் ஜோதி – 370   மண்ணினில் பொன்மை வகுத்து அதில் ஐமையை அண்ணுற வகுத்த அருட்பெருஞ்ஜோதி !   ஐமை – அழகு பொருந்திய / ஐந்து நிறங்கள் பொன் கூட விளையும்படி இந்த பூமியை வகுத்து அதில் பல்வேறு தன்மைகளை கொண்ட மண் வளங்களை உண்டாக்கி அவற்றை இந்த பூமியோடு பொருந்தி அமைத்த அருட்பெருஞ்ஜோதி !