admin

செடியறுத் தேதிட தேகமும் போகமும் அடியருக் கேதரு மருட்பெருஞ் ஜோதி   செடியறுத்தே திட தேகமும் போகமும் அடியருக்கே தரும் அருட்பெருஞ்ஜோதி !   செடியறுத்து – வல்வினைகளை போக்கி வல்வினைத் துன்பங்கள் அனைத்தையும் அழித்து, அடியவர்கள் செழித்து வாழும் பொருட்டு, ஒளி உடலையும் (பிரணவ தேகம்), நிலைத்த பேரின்பத்தையும் (போகம்) தன்னுடைய அடியார்களுக்கு மட்டுமே வழங்குகின்ற அருட்பெருஞ்ஜோதியே!

90. எம்புயக் கனியென வெண்ணுவா ரிதய வம்புயத் தமர்ந்த வருட்பெருஞ் ஜோதி   எம் புயக் கனி என எண்ணுவார் இதய அம்புயத்து அமர்ந்த அருட்பெருஞ்ஜோதி !   அம்புயம் – தாமரை எம்புயம் – உள்ளங்கை தியானித்து நினைப்பவர்களுக்கு உள்ளங்கையில் இருக்கும் இனிய கனி போல அருள்பாலிக்கும், உள்ளமாகிய தாமரை மலரில் (இதய கமலத்தில்) வீற்றிருக்கும் அருட்பெருஞ்ஜோதியே!

89. மந்தண மிதுவென மறுவிலா மதியால் அந்தணர் வழுத்து மருட்பெருஞ் ஜோதி   மந்தணம் இதுவென மறுவிலா மதியால் அந்தணர் வழுத்தும் அருட்பெருஞ்ஜோதி !   மந்தணம் – மறைபொருள்   மறு – குற்றம் அந்தணர் – ஞானம் பெற்றவர் அனைத்துக்கும் மூலமான மெய்ப்பொருள் அல்லது இரகசியம் என்பதை உணர்ந்து, குற்றம் நீங்கிய, களங்கமற்ற தூய அறிவைக் கொண்டுள்ள ஞானிகளால் போற்றித் துதிக்கப்படும் பேரொளி அருட்பெருஞ்ஜோதி ஆகும்.

உபரச வேதியி னுபயமும் பரமும் அபரமு மாகிய வருட்பெருஞ் ஜோதி   உபரச வேதியின் உபயமும் பரமும் அபரமும் ஆகிய அருட்பெருஞ்ஜோதி !   பரம் – மேல் உலகம்   அபரம் – கீழ் உலகம்   ரசவேதி – ரசவாதம் அருட்பெருஞ்ஜோதி ஆண்டவர், உலகப் பொருட்களை மாற்றியமைக்கும் இரட்டை இயல்பாகவும், அதே சமயம், எல்லாவற்றிற்கும் அப்பாற்பட்ட மூலமாகவும் (பரம்), உலகப் பொருட்களாக (அபரம்) உள்ளும் புறமும் நிறைந்துள்ளதாகவும் விளங்குகிறார்.

87. சிகரமும் வகரமுஞ் சேர்தனி யுகரமும் அகரமு மாகிய வருட்பெருஞ் ஜோதி   சிகரமும் வகரமும் சேர்தனி உகரமும் அகரமும் ஆகிய அருட்பெருஞ்ஜோதி !   ஓங்கார பிரணவமான “ஓம்” என்பதிலும், மற்றும் பஞ்சபூதங்களின் சூட்சும நிலையிலும் அருட்பெருஞ்ஜோதி ஆண்டவர் இருக்கிறார்.

86. சகமுதற் புறப்புறந் தங்கிய வகப்புறம் அகம்புற முற்றுமா மருட்பெருஞ் ஜோதி   சகம் முதல் புறப்புறம் தங்கிய அகப்புறம் அகம் புறம் முற்றுமாம் அருட்பெருஞ்ஜோதி !   அருட்பெருஞ்ஜோதியானது உலகப் பொருட்களாகிய வெளியிலும் (புறப்புறம்), அந்தப் பொருட்களின் இயக்கத்திற்குக் காரணமாக உள்ளே தங்கியிருக்கும் உயிராகவும் (அகப்புறம்), உடல் மற்றும் உயிர் ஆகிய இரண்டிலும் (அகம்புறம்) முழுமையாக நிறைந்து, எல்லாமாகவும் விளங்குகிறது என்பதை உணர்த்துகிறது.

85. எங்கெங் கிருந்துயி ரேதெது வேண்டினும் அங்கங் கிருந்தரு ளருட்பெருஞ் ஜோதி   எங்கெங்கு இருந்து உயிர் ஏதேது வேண்டினும் அங்கங்கு இருந்து அருள் அருட்பெருஞ்ஜோதி !   உலகத்தின் உயிர்கள், நன்மைகளை வேண்டி எங்கிருந்துப் பிரார்த்தனை செய்தாலும், அந்தந்த இடங்களிலேயே இருந்து அருள் வழங்குகின்ற அருட்பெருஞ்ஜோதியே!

84. சிந்தையிற் றுன்பொழி சிவம்பெறு கெனத்தொழி லைந்தையு மெனக்கரு ளருட்பெருஞ் ஜோதி   சிந்தையில் துன்பு ஒழி சிவம் பெறுக எனத் தொழில் ஐந்தையும் எனக்கருள் அருட்பெருஞ்ஜோதி !   மனதில் உள்ள எல்லாத் துன்பங்களையும் முற்றிலுமாக நீக்கி, “நீயே சிவத்தின் நிலையைப் பெறுவாய்” என்று ஆணையிட்டதோடு, பிரபஞ்சத்தின் ஐந்து தொழில்களையும் எனக்குச் செய்ய அருளிய அருட்பெருஞ்ஜோதியே!

83. எண்ணிற் செழுந்தே னினியதெள் ளமுதென அண்ணித் தினிக்கு மருட்பெருஞ் ஜோதி   எண்ணில் செழும் தேன் இனிய தெள் அமுது என அண்ணித்து இனிக்கும் அருட்பெருஞ்ஜோதி !   நினைத்துப் பார்க்கும்பொழுதே செழுமையான தேனின் சுவையை அளிப்பவராகவும், இனிமையான, தெளிந்த அமிர்தத்தைப் (சாகாவரம் தரும் அமிர்தம்) போலவும் விளங்கி, என்னை நெருங்கி வந்து எப்போதும் இனிமையாய் உள்ள அருட்பெருஞ்ஜோதியே!