admin

பரையொளி யென்மனப் பதியினில் விரித்தே அரசது வியற்றெனு மருட்பெருஞ் ஜோதி – 278   பரை ஒளி என் மனப் பதியினில் விரித்தே அரசது இயற்றெனும் அருட்பெருஞ்ஜோதி !   சக்தியின் அருள் ஒளியை எனது மனதினில் அளித்து,  மனதையே அந்த ஆற்றலுக்கு ஆட்சி செய்ய வைத்து அருளிய அருட்பெருஞ்ஜோதி !

கதிர்நல மென்னிரு கண்களிற் கொடுத்தே அதிசய மியற்றெனு மருட்பெருஞ் ஜோதி – 274   கதிர் நலம் என் இரு கண்களில் கொடுத்தே அதிசயம் இயற்று எனும் அருட்பெருஞ்ஜோதி !   ஞானபிரகாசத்தை என் பார்வையில் கொடுத்து அதன் மூலம் அதிசயங்களை இந்த உலகிற்கு நடத்தி அருள்வாய் என்று அருளிய அருட்பெருஞ்ஜோதி !

கற்பக மென்னுளங் கைதனிற் கொடுத்தே அற்புத மியற்றெனு மருட்பெருஞ் ஜோதி – 272   கற்பகம் என்னுளம் கைதனில் கொடுத்தே அற்புதம் இயற்று எனும் அருட்பெருஞ்ஜோதி !   கேட்டதையெல்லாம் தரக்கூடிய கற்பகத்தை என் உள்ளங்கையில் கொடுத்து அற்புதங்களை செய் என ஆற்றல் அருளிய அருட்பெருஞ்ஜோதி !

நல்லமு தென்னொரு நாவுளங் காட்டியென் அல்லலை நீக்கிய வருட்பெருஞ் ஜோதி – 270   நல் அமுது என் ஒரு நா உளம் காட்டி என் அல்லலை நீக்கிய அருட்பெருஞ்ஜோதி !   அமிர்தம் இதுதான் என்று என் உள்நாக்கில் சுவைக்க வைத்து என் பிறவிப் பிணியான துன்பத்தை நீக்கிய அருட்பெருஞ்ஜோதி !

ஆதியு மந்தமு மறிந்தனை நீயே ஆதியென் றருளிய வருட்பெருஞ் ஜோதி – 268   ஆதியும் அந்தமும் அறிந்த எனை நீயே ஆதி என்று அருளிய அருட்பெருஞ்ஜோதி !   மும்மூர்த்திகளால் கூட அறிய முடியாத அடி முடியை (ஆதி, அந்தம்) ஞானத்தால் பெற்ற நீயே இந்த பிரபஞ்சத்தின் மூலாதார (ஆதி) சக்தியாவாய் என்று அருளிய அருட்பெருஞ்ஜோதி !

இந்தசிற் ஜோதியி னியலுரு வாதி யந்தமென் றருளிய வருட்பெருஞ் ஜோதி – 266   இந்த சித்ஜோதியின் இயல் உரு ஆதி அந்தம் என்று அருளிய அருட்பெருஞ்ஜோதி !   ஞான பிரகாசத்தின் அறிவு வடிவான பேரொளியின் உண்மையான சொரூபமே, உலகங்கள் அனைத்தின் படைப்புக்கு மூலமான தொடக்கமும் (ஆதியும்), அழிவுக்கு (இறுதி முடிவும்) ஆகும் என்று உபதேசித்து அருளிய அருட்பெருஞ்ஜோதியே!

ஜோதியுட் ஜோதியின் சொருபமே யந்த மாதியென் றருளிய வருட்பெருஞ் ஜோதி – 264   ஜோதியுள் ஜோதியின் சொருபமே அந்தம் ஆதி என்றருளிய அருட்பெருஞ்ஜோதி !   அண்டங்களின் ஒளியிலும் உயிர்களின் ஒளியிலும் உள்ள நித்திய பேரொளியின் வடிவமும், அந்த வடிவமே எல்லாப் படைப்புகளுக்கும் மூலமான ஆதியும் ஆகும் என்று உபதேசித்து அருளிய அருட்பெருஞ்ஜோதியே!

படிமுடி கடந்தனை பாரிது பாரென அடிமுடி காட்டிய வருட்பெருஞ் ஜோதி – 262   படி முடி கடந்த எனை பாரிது பார் என அடி முடி காட்டிய அருட்பெருஞ்ஜோதி !   தவத்தின் எல்லா நிலைகளையும் நீ வெற்றிகரமாகக் கடந்துவிட்டாய், இனி ஞானத்தால் எல்லையற்ற உலகத்தைக் காண் என்று கூறி, தனது ஆதியும் அந்தமும் காண முடியாத, எல்லையற்ற முழு வடிவத்தை எனக்குக் காட்சி அளித்த அருட்பெருஞ்ஜோதியே!