admin

நவையிலா வுளத்தி னாடிய நாடிய வவையெலா மளிக்கு மருட்பெருஞ் ஜோதி – 300   நவையிலா உளத்தில் நாடிய நாடிய அவையெலாம் அளிக்கும் அருட்பெருஞ்ஜோதி !   எதுவும் தேவையில்லை என்ற மனப்பக்குவம் அடைந்த பின் ஞானத்திற்கு உரிய தேடுதல்களை உடனே அளிக்கும் அருட்பெருஞ்ஜோதி !

எல்லாம் வல்லசித் தெனக்களித் தெனக்குனை யல்லா திலையெனு மருட்பெருஞ் ஜோதி – 298   எல்லாம் வல்ல சித்து எனக்களித்து எனக்கு உனை அல்லாது இலை எனும் அருட்பெருஞ்ஜோதி !   எல்லாவிதமான வல்லமைகளையும் கொண்ட ஞான ஆற்றலை எனக்கு அளித்து, “இனி உனக்கு நம்மைத் தவிர வேறு துணை இல்லை” என்று உறுதியளித்து அருளிச் செய்த அருட்பெருஞ்ஜோதியே!

வாய்தற் குரித்தெனு மறையா கமங்களால் ஆய்தற் கரிய வருட்பெருஞ் ஜோதி – 296   வாய்தற்கு உரித்து எனும் மறை ஆகமங்களால் ஆய்தற்கு அரிய அருட்பெருஞ்ஜோதி !   வாய்மையை உரைக்கக்கூடியவை என்று சொல்லப்படும் வேதங்கள், ஆகமங்கள் போன்றவையாலும் ஆராய்ந்து பார்த்து அறிந்து கொள்ள முடியாத அருட்பெருஞ்ஜோதி !

சமயங் குலமுதற் சார்பெலாம் விடுத்த அமயந் தோன்றிய வருட்பெருஞ் ஜோதி – 294   சமயம் குல முதல் சார்பு எலாம் விடுத்த அமயம் தோன்றிய அருட்பெருஞ்ஜோதி !   சமயம், குலம் போன்ற சார்பு நிலையை விட்டு விலகியவுடன் அத்தருணத்தில் ஞானப் பிரகாசமாய் தோன்றிய அருட்பெருஞ்ஜோதி!

பற்றுக ளனைத்தையும் பற்றறத் தவிர்த்தென தற்றமு நீக்கிய வருட்பெருஞ் ஜோதி – 292   பற்றுகள் அனைத்தையும் பற்று அறத் தவிர்த்து எனது அற்றமும் நீக்கிய அருட்பெருஞ்ஜோதி !   உலக வாழ்க்கையின் பற்றுகள் அனைத்தையும் தவிர்த்து, எனது மரணத்தையும் நீக்கிய அருட்பெருஞ்ஜோதி !

மாண்டுழ லாவகை வந்திளங் காலையே ஆண்டுகொண் டருளிய வருட்பெருஞ் ஜோதி – 290   மாண்டு உழலா வகை வந்து இளங்காலையே ஆண்டு கொண்டு அருளிய அருட்பெருஞ்ஜோதி !   பிறப்பு இறப்பு எனும் சுழற்சியில் இருந்து இளமையிலேயே என்னை காப்பாற்றி ஆட்கொண்ட அருட்பெருஞ்ஜோதி !

எஞ்சே லுலகினில் யாதொன்று பற்றியும் அஞ்சே லென்றரு ளருட்பெருஞ் ஜோதி – 288   எஞ்சேல் உலகினில் யாதொன்று பற்றியும் அஞ்சேல் என்று அருள் அருட்பெருஞ்ஜோதி !   தோன்றி அழியக்கூடிய உலகப் பொருட்கள் மற்றும் பற்றுகள் போன்ற எதைப்பற்றியும் அச்சம் கொள்ளாதே என்று அருளிய அருட்பெருஞ்ஜோதி!

பிறிவே தினியுனைப் பிடித்தன முனக்குநம் மறிவே வடிவெனு மருட்பெருஞ் ஜோதி – 286   பிறிவு ஏது இனி உனைப் பிடித்தனம் உனக்கு நம் அறிவே வடிவு எனும் அருட்பெருஞ்ஜோதி !   இனி உனக்கு நம்மிடமிருந்து எந்தப் பிரிவும் இல்லை, உன்னை நாம் முழுமையாக பற்றிக் கொண்டோம். உனக்கு இனிமேல் நம்முடைய ஞானமே (ஒளி அறிவு) வடிவமாக அமையும் என்று உறுதியளித்து அருளிச் செய்த அருட்பெருஞ்ஜோதியே!