admin

சித்தியென் பதுநிலை சேர்ந்த வநுபவம் அத்திற லென்றவென் னருட்பெருஞ் ஜோதி – 252   சித்தி என்பது நிலை சேர்ந்த அநுபவம் அத்திறல் என்ற என் அருட்பெருஞ்ஜோதி !   சித்தி என்பது இறைநிலையை அடைந்ததால் உண்டாகும் அனுபவமே என்றும், அதுவே உண்மையான வல்லமை என்றும் எனக்குத் தெளிவாக உணர்த்திய என்னுடைய அருட்பெருஞ்ஜோதியே!

முத்தியென் பதுநிலை முன்னுறு சாதனம் அத்தக வென்றவென் னருட்பெருஞ் ஜோதி – 250   முத்தி என்பது நிலை முன்னுறு சாதனம் அத்தக என்ற என் அருட்பெருஞ்ஜோதி !   முத்தி என்பது நாம் அடைய வேண்டிய இறுதி இலக்கு அல்ல; அது, உலக நன்மைக்காக சித்திகளைச் செய்வதற்கான தகுதியைப் பெற, நாம் முன்னரே அடைய வேண்டிய ஒரு சாதனம் (நெறி) மட்டுமே என்று எனக்குத் தெளிவாக உணர்த்திய அருட்பெருஞ்ஜோதியே!

புடையுறு சித்தியின் பொருட்டே முத்தியை அடைவதென் றருளிய வருட்பெருஞ் ஜோதி – 248   புடையுறு சித்தியின் பொருட்டே முத்தியை அடைவதென்று அருளிய அருட்பெருஞ்ஜோதி !   உயர்ந்த நிலையான (புடை உறு) சித்தி நிலை அடைவதற்குதான் அதற்கு முந்தைய நிலையான முக்தி அடைவது என்று எனக்கு உணர்த்தி அருளிய அருட்பெருஞ்ஜோதி !

ஞானசித் தியின்வகை நல்விரி வனைத்தும் ஆனியின் றெனக்கரு ளருட்பெருஞ் ஜோதி – 246   ஞான சித்தியின் வகை நல் விரிவனைத்தும் ஆனியின்றி எனக்கு அருள் அருட்பெருஞ்ஜோதி !   தூய அறிவின் மூலம் அடையக்கூடிய ஞான சித்திகளின் வகைகள், அவற்றின் நன்மை நிறைந்த விரிவான பலன்கள் அனைத்தையும், குறைவில்லாமல் (ஆனியின்றி) என்னிடத்து நிலைபெற்று நிற்கும்படி எனக்கு அருளிச் செய்த அருட்பெருஞ்ஜோதியே!

யோகசித் திகள்வகை யுறுபல கோடியும் ஆகவென் றெனக்கரு ளருட்பெருஞ் ஜோதி – 244   யோக சித்திகள் வகை உறு பல கோடியும் ஆக என்று எனக்கு அருள் அருட்பெருஞ்ஜோதி !   யோகப் பயிற்சியால் அடையக்கூடிய பல கோடிக்கணக்கான சித்திகளின் வகைகளையும் நுட்பங்களையும், “அவை அனைத்தும் உனக்கு கிடைப்பதாக” என்று எனக்கு அருளிச் செய்த அருட்பெருஞ்ஜோதியே!

கருமசித் திகளின் கலைபல கோடியும் அரசுற வெனக்கரு ளருட்பெருஞ் ஜோதி – 242   கரும சித்திகளின் கலை பல கோடியும் அரசுற எனக்கருள் அருட்பெருஞ்ஜோதி !   அட்டமா சித்திகளின் எண்ணிலடங்காத, பல கோடிக்கணக்கான நுட்பங்கள் அனைத்தையும், நான் அவற்றின்மேல் ஆதிக்கம் செலுத்தி ஆளும்படியாக (அரசுற) எனக்கு வழங்கியருளிய அருட்பெருஞ்ஜோதியே!

மூவகைச் சித்தியின் முடிபுகள் முழுவதும் ஆவகை யெனக்கரு ளருட்பெருஞ் ஜோதி – 240   மூவகைச் சித்தியின் முடிபுகள் முழுவதும் ஆவகை எனக்கு அருள் அருட்பெருஞ்ஜோதி !   கர்ம, யோக, ஞான சித்திகளின் விளைவுகள் மற்றும் முடிவுகள் அனைத்தும் எனக்கு கைக்கூட அருள் செய்யும் அருட்பெருஞ்ஜோதி !

முத்திறல் வடிவமு முன்னியாங் கெய்துறு மத்திற லெனக்கரு ளருட்பெருஞ் ஜோதி – 238   முத்திறல் வடிவமும் உன்னி ஆங்கு எய்துறும் அத்திறல் எனக்கு அருள் அருட்பெருஞ்ஜோதி !   உலக இயக்கங்களின் அடிப்படையான ஆக்கல், காத்தல், அழித்தல் போன்ற வல்லமைகளை அளித்ததோடு, நினைத்ததை உடனே கைக்கூட செய்யும் வல்லமையையும் அருளும் அருட்பெருஞ்ஜோதி !

நீடுக நீயே நீளுல கனைத்தும்நின் றாடுக வென்றவென் னருட்பெருஞ் ஜோதி – 236   நீடுக நீயே நீள் உலகம் அனைத்தும் நின்று ஆடுக என்ற என் அருட்பெருஞ்ஜோதி !   நீயே மரணமிலாப் பெருவாழ்வுடன் நீடூழி வாழ்வாயாக! மேலும், பரந்து விரிந்த உலகங்கள் அனைத்தையும் நீயே நிலைத்து நின்று ஆட்சி செய்வாயாக” என்று பரம்பொருளின் சகல அதிகாரத்தையும் எனக்கு வழங்கி ஆணையிட்ட அருட்பெருஞ்ஜோதியே!