admin

நீரிடை யொளியியல் நிகழ்பல குணவியல் ஆர்தர வகுத்த வருட்பெருஞ் ஜோதி – 418 நீரிடை ஒளிஇயல் நிகழ்பல குணஇயல் ஆர்தர வகுத்த அருட்பெருஞ்ஜோதி நீர் என்னும் பூதத்தில் ஒளியின் இயல்பையும், அதனால் விளங்கும் பலவிதமான குணங்களின் இயல்பையும் நிகழச் செய்து, அதன் மூலம் உயிர்கள் இன்பம் அடையும் பொருட்டு முறையாகப் பகுத்து அமைத்து அருளிய அருட்பெருஞ்ஜோதியே!

நீரிடை யடிநடு நிலையுற வகுத்தன லார்தரப் புரிந்த வருட்பெருஞ் ஜோதி – 416 நீரிடை அடிநடு நிலை உறவகுத்து அனல் ஆர்தரப் புரிந்த அருட்பெருஞ்ஜோதி நீரிலே அடி நடு என்ற நிலையை வகுத்து அதில் வெப்பத்தையும் வெளிப்படுத்துமாறு அமைத்த அருட்பெருஞ்ஜோதி !

நீரிடை நான்கிய னிலவுவித் ததிற்பல ஆர்தர வகுத்த வருட்பெருஞ் ஜோதி – 414 நீரிடை நான்குஇயல் நிலவுவித்து அதில்பல ஆர்தர வகுத்த அருட்பெருஞ்ஜோதி நீருக்குள்ளே அதன் அடிப்படை நான்கு விதமான இயல்புகளை நிலைநிறுத்தி, அந்த இயல்புகளின் மூலமாகவே உலக உயிர்கள் பலவிதமான பயன்களைப் பெற்று நிறைவுறும்படி நுட்பமாகப் பகுத்து அமைத்த பேரருள் ஒளியே!

நீரினிற் கருநிலை நிகழ்த்திய பற்பல ஆருற வகுத்த வருட்பெருஞ் ஜோதி – 412   நீரினில் கருநிலை நிகழ்த்திய பற்பல ஆர்உற வகுத்த அருட்பெருஞ்ஜோதி   ஆருற – நிறைவு உண்டாகும்படி செய்த நீருக்குள்ளே (உயிர்த் தோற்றத்திற்குக் காரணமான) அடிப்படை ஆக்க சக்தியை (கருநிலையை) நிலைபெறச் செய்து, அந்தச் சக்தியிலிருந்து எண்ணற்ற வடிவங்களும், உயிர்களும் நிறைவுறும்படி நுட்பமாக வகுத்து அமைத்தருளிய பேரருள் ஒளியே!

நீரினிற் சுவைநிலை நிரைத்ததிற் பல்வகை ஆருறப் புரிந்த வருட்பெருஞ் ஜோதி – 410   நீரினில் சுவைநிலை நிரைத்து அதில் பல்வகை ஆர்உறப் புரிந்த அருட்பெருஞ்ஜோதி   நீருக்குள் அதன் இயல்பான சுவை நிலையை நிலைபெறச் செய்து (நிரைத்து), அந்தச் சுவைக்குள்ளேயே பலவிதமான வேறுபாடுகளையும், இன்பங்களையும் நிறைவாக உண்டாக்கிக் கொடுத்த அருட்பெருஞ்ஜோதியே!

நீரிடைப் பூவியல் நிகழுறு திறவியல் ஆர்தர வகுத்த வருட்பெருஞ் ஜோதி – 408   நீரிடைப் பூவியல் நிகழ்உறு திறவியல் ஆர்தர வகுத்த அருட்பெருஞ்ஜோதி   நீர், பூமி உட்பட எங்கும் நிறைந்துள்ள இயற்கையின் செயல்பாடுகளையும், அவற்றின் ஆற்றல்களையும், திறன்களையும் மிகச் செம்மையாக வகுத்து நிலைநிறுத்திய பேரருள் ஒளியே!

நீரினிற் பசுமையை நிறுத்தி யதிற்பல வாருற வகுத்த வருட்பெருஞ் ஜோதி – 406   நீரினில் பசுமையை நிறுத்தி அதில்பல ஆர்உற வகுத்த அருட்பெருஞ்ஜோதி   நீர் என்னும் பூதத்தில், தாவரங்கள் மற்றும் நிலத்தின் வளமான பசுமைத் தன்மையை நிலைபெறச் செய்து, அதன் மூலம் கிடைக்கும் பலவிதமான உணவுப் பொருட்களும் இன்பங்களும் உயிர்களுக்குக் கிடைக்கப் பொருந்தும்படி அமைத்து அருளிய அருட்பெருஞ்ஜோதியே!

நீரினிற் றண்மையும் நிகழூ ரொழுக்கமும் ஆருற வகுத்த வருட்பெருஞ் ஜோதி – 404   நீரினில் தண்மையும் நிகழ்ஊ ரொழுக்கமும் ஆர்உற வகுத்த அருட்பெருஞ்ஜோதி   தண் – குளிர்ச்சி நீரின் இயல்பான குளிர்ச்சிப் பண்பையும், அது பாயும் ஒழுங்கான ஓட்டத்தையும் (இயக்கத்தையும்) உலக உயிர்கள் இன்புற்று வாழும்படி முறையாகப் பகுத்து அமைத்த அருட்பெருஞ்ஜோதியே!

மண்ணியல் பலபல வகுத்ததிற் பிறவும் அண்ணுற வமைத்த வருட்பெருஞ் ஜோதி – 402   மண்இயல் பலபல வகுத்து அதில் பிறவும் அண்உற அமைத்த அருட்பெருஞ்ஜோதி   பூமியின் இயல்பான அம்சங்களை (மண் வகைகள், வளங்கள்) பல பிரிவுகளாக வகுத்து அமைத்து, அந்தப் பூமியின் பயன்பாட்டினை, சமநிலையாக பொருந்தும்படி செய்தருளிய அருட்பெருஞ்ஜோதியே!